nasheb-e-vahm farāz-e-gurez-pā ke liye
hisār-e-ḳhāk hai had par har intihā ke liye
vufūr-e-nashshā se rañgat siyāh sī hai mirī
jalā huuñ maiñ bhī ajab chashm-e-surma-sā ke liye
hai ird-gird ghanā ban hare daraḳhtoñ kā
khulā hai dar kisī dīvār meñ havā ke liye
zamīñ hai maskan-e-shar āsmāñ sarāb-ālūd
hai saarā ahd sazā meñ kisī ḳhatā ke liye
asīrī-e-pas-e-ā.īna-e-baqā aur tū
nikal ke aa bhī vahāñ se kabhī ḳhudā ke liye
khaḌā huuñ zer-e-falak gumbad-e-sadā meñ 'munīr'
ki jaise haath uThā ho koī duā ke liye