ashk-e-ravāñ kī nahr hai aur ham haiñ dosto
us bevafā kā shahr hai aur ham haiñ dosto
ye ajnabī sī manzileñ aur raftagāñ kī yaad
tanhā.iyoñ kā zahr hai aur ham haiñ dosto
laa.ī hai ab uḌā ke ga.e mausamoñ kī baas
barkhā kī rut kā qahr hai aur ham haiñ dosto
phirte haiñ misl-e-mauj-e-huā shahr shahr meñ
āvārgī kī lahr hai aur ham haiñ dosto
shām-e-alam Dhalī to chalī dard kī havā
rātoñ kī pichhlā pahr hai aur ham haiñ dosto
āñkhoñ meñ uḌ rahī hai luTī mahfiloñ kī dhuul
ibrat-sarā-e-dahr hai aur ham haiñ dosto