rañgoñ kī vahshatoñ kā tamāshā thī bām-e-shām
taarī thā har makāñ pe jalāl-e-davām-e-shām
guldasta-e-jihāt thā nairañg-e-rāh-e-ishq
thā ik tilism-e-husn-e-ḳhayābān-e-dām-e-shām
aage kī manziloñ kī taraf shaam kā safar
jaise shaboñ ke dil meñ thā shahr-e-qayām-e-shām
bāñdhe hue haiñ vaqt sabhī us ke hukm meñ
hai jis ḳhudā ke haath meñ kār-e-nizām-e-shām
dhuñdlā ga.ī hai shaam shab-e-ḳhām se 'munīr'
ḳhālī huā kashish kī sharāboñ se jām-e-shām