apnī hī teġh-e-adā se aap ghāyal ho gayā
chāñd ne paanī meñ dekhā aur pāgal ho gayā
vo havā thī shaam hī se raste ḳhālī ho ga.e
vo ghaTā barsī ki saarā shahr jal-thal ho gayā
maiñ akelā aur safar kī shaam rañgoñ meñ Dhalī
phir ye manzar merī nazroñ se bhī ojhal ho gayā
ab kahāñ hogā vo aur hogā bhī to vaisā kahāñ
soch kar ye baat jī kuchh aur bojhal ho gayā
husn kī dahshat ajab thī vasl kī shab meñ 'munīr'
haath jaise intihā-e-shauq se shal ho gayā