ḳhayāl jis kā thā mujhe ḳhayāl meñ milā mujhe
savāl kā javāb bhī savāl meñ milā mujhe
gayā to is tarah gayā ki muddatoñ nahīñ milā
milā jo phir to yuuñ ki vo malāl meñ milā mujhe
tamām ilm ziist kā guzishtagāñ se hī huā
amal guzishta daur kā misāl meñ milā mujhe
har ek saḳht vaqt ke baad aur vaqt hai
nishāñ kamāl-e-fikr kā zavāl meñ milā mujhe
nihāl sabz rañg meñ jamāl jis kā hai 'munīr'
kisī qadīm ḳhvāb ke muhāl meñ milā mujhe