jo dekhe the jaadū tire haat ke
haiñ charche abhī tak isī baat ke
ghaTā dekh kar ḳhush huiiñ laḌkiyāñ
chhatoñ par khile phuul barsāt ke
mujhe dard dil kā vahāñ le gayā
jahāñ dar khule the tilismāt ke
havā jab chalī phaḌphaḌā kar uḌe
parinde purāne mahallāt ke
na tū hai kahīñ aur na maiñ huuñ kahīñ
ye sab silsile haiñ ḳhayālāt ke
'munīr' aa rahī hai ghaḌī vasl kī
zamāne ga.e hijr kī raat ke