vo yaad kar bhī rahā ho to fā.eda kyā hai
ye dil ujaaḌ paḌā hai ise milā kyā hai
bahut dinoñ se ye dil yūñhī ro rahā hai aur
batā rahā hī nahīñ hai ise huā kyā hai
zarā sī der utarne de apnī āñkhoñ meñ
zarā ye dekhne to de ye rāsta kyā hai
ik aur bhuuk thī jis ne mujhe faqīr kiyā
vagarna paas tire husn ke sivā kyā hai
maiñ apne-āp se kam bhī huuñ aur ziyāda bhī
vo jāntā bhī hai mujh ko to jāntā kyā hai
ye dard-e-ḳhvāb hai is ko bhī chakh ke dekh hī luuñ
pata kahīñ to chale ḳhvāb meñ mazā kyā hai