ik roz ye sar-rishta-e-idrāk jalā duuñ
ai ishq tirī vahshat-e-saffāk jalā duuñ
ho bas meñ jo mere to tirā naam bhī miT jaa.e
maiñ kar ke tujhe ḳhaak tirī ḳhaak jalā duuñ
siine meñ ulajhtī hai rag-e-dil se rag-e-dil
ai ishq havā de ḳhas-e-namnāk jalā duuñ
tāsīr meñ kam ho to karūñ sher ko bhī aaq
ātish meñ jo kam ho vo rag-e-tāk jalā duuñ
nazzāra koī yuuñ bhī na mahram ho ki 'kāshif'
āñkhoñ ko sar-e-jalva-e-bebāk jalā duuñ