tirī āñkhoñ ko tere husn kā dar jaanā thā
ham ne dariyā ko hī dariyā kā safar jaanā thā
muntazir the tire malbūs ke sūkhe hue phuul
vo jinheñ tere pahanñe se sañvar jaanā thā
izn-dar-izn chamakte the sitāre dil ke
aaj sab ko tirī āñkhoñ meñ utar jaanā thā
reza-e-kuhl ke mānind kisī roz hameñ
terī palkoñ ke kināre pe bikhar jaanā thā
vaa.e is dil ko na denī thī kabhī ruḳhsat-e-hijr
tere hoñToñ ke qadam chuum ke mar jaanā thā
aur phir yuuñ hai ki rakhtī thiiñ jo is dil ko ḳharāb
un nigāhoñ ko tirī aur sañvar jaanā thā