taḌap bhī hai mirī aur bā.is-e-sukūñ bhī hai
tirā badan mirā hāsil bhī hai, junūñ bhī hai
badan pe dauḌtī āñkhoñ kī pyaas ġhaur se paḌh
ki aañkh zarra-e-sahrā-e-andarūñ bhī hai
qubūl kar nigah-e-pā.emāl ḳhush-badanī
mirī anā kā ye parcham hai, aur nigūñ bhī hai
mirī nigāh bhī bahkī huī hai kuchh, aur kuchh
hayā-e-husn ruḳh-e-yār par fuzūñ bhī hai
tumhārī diid kī bhī hai mahak in āñkhoñ meñ
isī navāh meñ ḳhushbū-e-jū-e-ḳhūñ bhī hai