jaane kyuuñ barbād honā chāhtā hai
sūrat-e-farhād honā chāhtā hai
zehn se āḳhir maiñ ab thak haar kar
merā dil ābād honā chāhtā hai
āsmāñ vaale ye sun kar hañs paḌe
aadmī āzād honā chāhtā hai
har jagah ta.amīr kar ke ik iram
har koī shaddād honā chāhtā hai
sāneha ye hai ki ik bulbul kā dil
dāman-e-sayyād honā chāhtā hai
ho ke munsif taḳht pe ab jalva-gar
vāqif-e-rūdād honā chāhtā hai