dil ke har juzv meñ judā.ī hai
kyā balā vasl kī samā.ī hai
nā-rasā.ī sar-e-rasā.ī hai
zo.af kī tāqat āzmā.ī hai
jām-o-mīnā pe nuur barse hai
kyā ghaTā mai-kade pe chhā.ī hai
yuuñ to vo ālam-āshnā hai magar
ik mujhī se zarā laḌā.ī hai
tū milā ġhair se ki ḳhaak meñ ham
āqibat har tarah safā.ī hai
tum judā ġhair se hue the kab
vājibī ta.an-e-bevafā.ī hai
ai 'qalaq' ham se to milā kar yaar
ḳhālis ulfat meñ kyā burā.ī hai