zindagī ko ek ma.anī de gayā
vo mujhe ik rut suhānī de gayā
vo to apne lams se atrāf meñ
ḳhushbū jaise zāfrānī de gayā
soch kar jiite rahe shām-o-sahar
ḳhvāb jaisī ik kahānī de gayā
muntashir haiñ dhaḌkanoñ ke saaz bhī
dard meñ aisī ravānī de gayā
Tiis ban kar rah gayā pahlū meñ jo
zaḳhm aisā jāvedānī de gayā
chhīn kar lab se tabassum kī lakīr
jhiil sī āñkhoñ meñ paanī de gayā