har ek raat ko mahtāb dekhne ke liye

maiñ jāgtā huuñ tirā ḳhvāb dekhne ke liye

na jaane shahr meñ kis kis se jhuuT bolūñgā

maiñ ghar ke phūloñ ko shādāb dekhne ke liye

isī liye maiñ kisī aur kā na ho jā.ūñ

mujhe vo de gayā ik ḳhvāb dekhne ke liye

kisī nazar meñ to rah jaa.e āḳhirī manzar

koī to ho mujhe ġharqāb dekhne ke liye

ajiib sā hai bahānā magar tum aa jaanā

hamāre gaañv kā sailāb dekhne ke liye

paḌosiyoñ ne ġhalat rañg de diyā 'az.har'

vo chhat pe aayā thā mahtāb dekhne ke liye