matlab ke liye haiñ na ma.ānī ke liye haiñ

ye sher tabī.at kī ravānī ke liye haiñ

vo chashm agar sehr-bayānī ke liye hai

ye lab bhī mirī tishna-dahānī ke liye haiñ

jo mere shab-o-roz meñ shāmil hī nahīñ the

kirdār vahī merī kahānī ke liye haiñ

ye daaġh mohabbat kī nishānī ke alāva

ai ishq tirī marsiya-ḳhvānī ke liye haiñ

aatī hai sukūt-e-sahar-o-shām kī āvāz

dar-asl to ham naql-e-makānī ke liye haiñ

jo rañg gul o laala o nasrīñ se haiñ mansūb

vo rañg ab āshufta-bayānī ke liye haiñ