ism saare bhuul baiThā sho.abda-gar kis tarah
jam.a honā hai mujhe ab ke bikhar kar kis tarah
maiñ duā ke par lagā kar bhī pahuñch paatā nahīñ
āsmāñ uThtā chalā jaatā hai uupar kis tarah
vāhime kaise yaqīñ ban kar lahū meñ rach ga.e
zalzale phaile mirī miTTī ke andar kis tarah
vasvasoñ ne aan gherā hai mujhe phir kis liye
rakh diyā maiñ ne qadam mauj-e-havā par kis tarah
dekhte haiñ sab 'munavār' sochtā koī nahīñ
aks rah jaatā hai ā.īne ke andar kis tarah