ḳhud ko paane kī justujū hai vahī

us se milne kī aarzū hai vahī

us kā chehra usī ke ḳhadd-o-ḳhāl

apnā mauzū-e-guftugū hai vahī

haiñ usī ke ye rañg-hā-e-suḳhan

mere pahlū meñ ḳhūb-rū hai vahī

kitne mausam badal ga.e lekin

dil vahī dil kī aarzū hai vahī

hai vahī shauq-e-chāk-dāmānī

aur phir ḳhvāhish-e-rafū hai vahī

sajda-bāzān-e-shahr pā.inda

dast-e-āzar kī aabrū hai vahī

ḳhū-e-taslīm sar salāmat-bād

bandagī tauq-e-dar-gulū hai vahī

kam nahīñ shor-e-nāla-o-fariyād

mātam-e-shahr aarzū hai vahī