phir kisī ḳhvāb kī palkoñ pe savārī aa.ī

ḳhush-umīdī ko liye bād-e-bahārī aa.ī

phuul aa.e haiñ na.ī rut ke na.ī shāḳhoñ par

mauja-e-māh-e-dil-e-ārām kī baarī aa.ī

nā-murādāna kahīñ umr basar hotī hai

shād-kāmī ke liye yaad tumhārī aa.ī

aur phir phail gayā rang-e-mohabbat ruḳh par

lāla-e-zaḳhm liye yaar kī yaarī aa.ī

ik din ham ne zabāñ khol dī sach kahne ko

aur phir shāmat-e-a.amāl hamārī aa.ī

havas-e-ishq ke ahvāl baham karne ko

parda-e-sher meñ afsāna-nigārī aa.ī