dil to ik shaḳhs ko naḳhchīr banāne meñ gayā
sāz-e-dil naġhma-e-dil-gīr banāne meñ gayā
raat ik ḳhvāb jo dekhā to huā ye mālūm
din bhī us ḳhvāb kī tasvīr banāne meñ gayā
partav-e-ḳhāna-e-mauhūm ġhanīmat thā magar
vo bhī ik naqsha-e-tāmīr banāne meñ gayā
ruuh to ruuh hai kuchh bas nahīñ is par lekin
ye badan ḳhaak ko iksīr banāne meñ gayā
yaar to dirham o dīnār banāne meñ ga.e
aur maiñ ishq kī jāgīr banāne meñ gayā
sher tāsīr se ḳhālī huā vaqt-e-tābīr
nafs-e-mazmūn bhī taqrīr banāne meñ gayā