kaun kahtā hai tum adā na karo
par vafā kī jagah jafā na karo
sarv kaT jā.eñge pisegī hinā
is tarah baaġh meñ phirā na karo
hañs rahe haiñ abhī ḳhushī meñ vo
mere rone kā tazkira na karo
zaḳhm-e-dil par na ho namak-pāshī
is maze se to āshnā na karo
hai qayāmat tumhārī aTkhelī
hashr ai jān-e-man bapā na karo
ḳhirman-e-dil pe barq girtī hai
mere rone pe tum hinsā na karo
ne.amat-e-ishq hai ye dāġh-e-jigar
shukr-e-haq ke sivā gilā na karo
hai shab-e-vasl be-takalluf ho
shoḳhiyāñ kahtī haiñ hayā na karo
huuñ giraftār-e-ulfat-e-gesū
mujh ko bahr-e-ḳhudā rihā na karo
shauq kahtā hai ḳhud chale jaao
minnat-e-nāma-bar kiyā na karo
dil lagānā burā hai ai 'ājiz'
chup raho us kā tazkira na karo