har-chand bhulātā huuñ bhulāyā nahīñ jaatā
ik naqsh-e-taḳhayyul hai miTāyā nahīñ jaatā
maiñ ne jo kahā dard baḌhāyā nahīñ jaatā
kahne lage nādān jatāyā nahīñ jaatā
ummīd kī kashtī ko sahārā to lagā do
maanā ki tumheñ saath biThāyā nahīñ jaatā
vo dāġh-e-mohabbat kā nishāñ pūchh rahe haiñ
hālāñki samajhte haiñ dikhāyā nahīñ jaatā
ab un kā taqāza hai kahānī nahīñ kahte
jab qissa-e-ġham ham se sunāyā nahīñ jaatā
īzā-talabī kī koī had ho to jafā ho
ab vo bhī haiñ majbūr satāyā nahīñ jaatā
tum aaoge aur shab ko zarā soch ke kahte
tum se to tasavvur meñ bhī aayā nahīñ jaatā
'tālib' mirī bāteñ unheñ bāvar nahīñ ātīñ
dil chiir ke pahlū ko dikhāyā nahīñ jaatā