na manzil huuñ na manzil-āshnā huuñ
misāl-e-barg uḌtā phir rahā huuñ
mirī āñkhoñ ke ḳhushk-o-tar meñ jhāñko
kabhī sahrā kabhī dariyā-numā huuñ
vo aisā kaun hai jis se bichhaḌ kar
ḳhud apne shahr maiñ tanhā huā huuñ
chaman merā nahīñ phir bhī chaman meñ
maiñ tanhā rañg-o-nik.hat āshnā huuñ
na jaane kis liye hai naaz mujh ko
na tujh sā huuñ na tujh se kuchh sivā huuñ
mire anfās kī tauqīr karnā
baḌī mushkil se maiñ zinda huā huuñ
jo merī ruuh meñ utrā huā hai
maiñ us se be-ta.alluq bhī rahā huuñ
maiñ us ko DhūñDhtā phirtā huuñ har sū
jo mujh se kah sake maiñ bevafā huuñ
batātā kyuuñ nahīñ koī ki ab maiñ
kahāñ huuñ kis taraf ko jā rahā huuñ
havā-e-kū-e-jānāñ multafit hai
so apne rañj kahne aa gayā huuñ
sulā do ai havāo ab sulā do
bahut rātoñ kā maiñ jaagā huā huuñ