raushnī hasb-e-zarūrat bhī nahīñ māñgte ham
raat se itnī suhulat bhī nahīñ māñgte ham
dushman-e-shahr ko aage nahīñ baḌhne dete
aur koī tamġha-e-jur.at bhī nahīñ māñgte ham
sañg ko shīsha banāne kā hunar jānte haiñ
aur is kaam kī ujrat bhī nahīñ māñgte ham
kisī dīvār ke saa.e meñ Thahar lene de
dhuup se itnī ri.āyat bhī nahīñ māñgte ham
saarī dastāroñ pe dhabbe haiñ lahū ke 'az.har'
aise kuufe meñ to izzat bhī nahīñ māñgte ham