visāl kī sarhadoñ tak aa kar jamāl terā palaT gayā hai

vo rañg tū ne mirī nigāhoñ pe jo bikherā palaT gayā hai

kahāñ kī zulfeñ kahāñ ke bādal sivā.e tīra-nasīboñ ke

mirī nazar ne jise pukārā vahī añdherā palaT gayā hai

na chhāñv karne ko hai vo āñchal na chain lene ko haiñ vo bāñheñ

musāfiroñ ke qarīb aa kar har ik baserā palaT gayā hai

mire tasavvur ke rāstoñ meñ ubhar ke Duubī hazār aahaT

na jaane shām-e-alam se mil kar kahāñ saverā palaT gayā hai

milā mohabbat kā rog jis ko 'qatīl' kahte haiñ log jis ko

vahī to dīvāna kar ke terī galī kā pherā palaT gayā hai