kījiye hunar kā zikr kyā ābrū-e-hunar nahīñ

sab ke banā.e ham ne ghar aur hamārā ghar nahīñ

kaisā ajiib vaqt hai koī bhī ham-safar nahīñ

dhuup bhī mo'tabar nahīñ saaya bhī mo'tabar nahīñ

jo mere ḳhvāb meñ rahī paikar-e-rañg-e-nūr thī

ye to lahūluhān hai ye to mirī sahar nahīñ

bhaTke hue haiñ qāfile kaise mileñgī manzileñ

sab to bane haiñ rāhzan koī bhī rāhbar nahīñ

kaisā ajiib hādsa ham pe guzar gayā 'anīs'

raakh kabhī ke ho chuke aur hameñ ḳhabar nahīñ