aab meñ zā.iqa-e-shīr nahīñ ho saktā

ḳhvāb to ḳhvāb hai ta.abīr nahīñ ho saktā

mujh ko pāband-e-salāsil koī jitnā kar le

par mirā azm to zanjīr nahīñ ho saktā

har taraf ġhul hai shahanshāh kī marzī ke baġhair

ab koī lafz bhī tahrīr nahīñ ho saktā

rizq jaisā hai muqaddar meñ likhā hotā hai

fan kisī shaḳhs kī jāgīr nahīñ ho saktā

ham ne darvāza-e-mizhgāñ pe sajā rakkhā hai

vo sitārā ki jo tasḳhīr nahīñ ho saktā