ham ne qissa bahut kahā dil kā
na sunā tum ne mājrā dil kā
apne matlab kī sab hī kahte haiñ
hai nahīñ koī āshnā dil kā
ishq meñ aisī khīñchī rusvā.ī
ho gayā shor jā bajā dil kā
is qadar be-havās rahtā hai
jaise kuchh koī le gayā dil kā
ek bose pe bechte the ham
tū ne saudā na kuchh kiyā dil kā
tere milne se fā.eda kyā hai
na ho hāsil jo mudda.ā dil kā
kyuuñ diyā 'āsif' us sitamgar ko
aap tū mudda.ī huā dil kā