dil ko ġham-e-hayāt gavārā hai in dinoñ
pahle jo dard thā vahī chārā hai in dinoñ
har sail-e-ashk sāhil-e-taskīñ hai āj-kal
dariyā kī mauj mauj kinārā hai in dinoñ
ye dil zarā sā dil tirī yādoñ meñ kho gayā
zarre ko āñdhiyoñ kā sahārā hai in dinoñ
sham.oñ meñ ab nahīñ hai vo pahlī sī raushnī
kyā vāqa.ī vo anjuman-ārā hai in dinoñ
tum aa sako to shab ko baḌhā duuñ kuchh aur bhī
apne kahe meñ sub.h kā taarā hai in dinoñ