aatā hai teġh haath meñ vo jañg-jū liye

jaatā huuñ maiñ bhī sar ke ta.iiñ rū-ba-rū liye

gulzār yak-ba-yak jo mahakne lagā hai yuuñ

sach kah sabā tū phirtī hai yaañ kis kī bū liye

so.e kabhī na saath hamāre ḳhushī se tum

jāveñge gor meñ yahī ham aarzū liye

detā nahīñ hai chain ilāhī maiñ kyā karūñ

phirtā huuñ rāt-din dil-e-betāb kū liye

'āsif' na chhoḌ dast-e-saḳhāvat ko zīnhār

laayā hai kuchh na saath na jāvegā tū liye