ḳhvāb aur haqīqat kī tasvīr nazar aa.ī
tadbīr ināñ-gīr-e-taqdīr nazar aa.ī
āfāt-e-musalsal meñ ik rabt nazar aayā
hālāt-e-digar-gūñ meñ zanjīr nazar aa.ī
jo apne naqā.is the vo husn nazar aa.e
auroñ meñ jo ḳhūbī thī taqsīr nazar aa.ī
rāzī-ba-razā ho kar dekhā to musībat bhī
gul-hā-e-shagufta kī zanjīr nazar aa.ī
yādoñ ke jharoke se dekhā to mujhe 'tālib'
ayyām-e-bahārāñ kī tasvīr nazar aa.ī