ġhazal kī chāhatoñ ash.ār kī jāgīr vaale haiñ
tumheñ kis ne kahā hai ham barī taqdīr vaale haiñ
vo jin ko ḳhud se matlab hai siyāsī kaam dekheñ vo
hamāre saath aa.eñ jo parā.ī pair vaale haiñ
vo jin ke paañv the āzād pīchhe rah ga.e haiñ vo
bahut aage nikal aa.eñ haiñ jo zanjīr vaale haiñ
haiñ khoTī niyyateñ jin kī vo kuchh bhī pā nahīñ sakte
nishāne kyā lageñ un ke jo TeḌhe tiir vaale haiñ
tumhārī yādeñ patthar bāziyāñ kartī haiñ siine meñ
hamāre haal bhī ab hū-ba-hū kashmīr vaale haiñ