ḳhud apne ḳhuun meñ pahle nahāyā jaatā hai

vaqār ḳhud nahīñ bantā banāyā jaatā hai

kabhī kabhī jo parinde bhī an-sunā kar deñ

to haal dil kā shajar ko sunāyā jaatā hai

hamārī pyaas ko zanjīr bāñdhī jaatī hai

tumhāre vāste dariyā bahāyā jaatā hai

navāztā hai vo jab bhī azīzoñ ko apne

to sab se ba.ad meñ ham ko bulāyā jaatā hai

hamīñ talāsh ke dete haiñ rāsta sab ko

hamīñ ko ba.ad meñ rāsta dikhāyā jaatā hai