yuuñ to kahne ke liye sub.h ke āsār bhī the
maiñ rahā chup ki mire sāmne kohsār bhī the
ḳhauf se chīḳhne vāloñ meñ akelā maiñ thā
log sahme hue lekin pas-e-dīvār bhī the
tez āñdhī meñ faqat ham gire aisā to nahīñ
duur tak raah meñ ukhḌe hue ashjār bhī the
umr bhar jis kī talab ne rakhā mahsūr hameñ
ham hī us shahr-e-tilismāt ke me.amār bhī the
thā hamīñ se kabhī tahzīb-o-tamaddun kā vaqār
ham kabhī shāḳh-e-gul-e-tar kabhī talvār bhī the