is haal meñ jiite ho to mar kyuuñ nahīñ jaate

yuuñ TuuT chuke ho to bikhar kyuuñ nahīñ jaate

kaise haiñ ye armān ye kāvish ye tag-o-dau

manzil nahīñ ma.alūm to ghar kyuuñ nahīñ jaate

ashkoñ kī tarah kyuuñ mirī palkoñ pe ruke ho

ḳhanjar kī tarah dil meñ utar kyuuñ nahīñ jaate

maanā ki ye sab zaḳhm-e-jigar tum ne diye haiñ

marham se kisī aur ke bhar kyuuñ nahīñ jaate

ā.īna hai māhaul hai asbāb haiñ tum ho

ḳhātir mirī ik baar sañvar kyuuñ nahīñ jaate

be-ḳhud the kiyā ġhair se va.ada mujhe manzūr

aayā hai agar hosh mukar kyuuñ nahīñ jaate

ai 'tāj' ummīdoñ ke ye mausam bhī ajab haiñ

har rut kī tarah ye bhī guzar kyuuñ nahīñ jaate