us se bichhaḌ ke bāb-e-hunar band kar diyā

ham jis meñ jī rahe the vo ghar band kar diyā

shāyad ḳhabar nahīñ hai ġhazālān-e-shahr ko

ab ham ne jañgaloñ kā safar band kar diyā

apne lahū ke shor se tañg aa chukā huñ maiñ

kis ne ise badan meñ nazar-band kar diyā

ab DhūñD aur qadr-shanāsān-e-rañg-o-bū

ham ne ye kaam ai gul-e-tar band kar diyā

ik ism-e-jāñ pe Daal ke ḳhāk-e-farāmushī

andhe sadaf meñ ham ne guhar band kar diyā