kahīñ to luTnā hai phir naqd-e-jāñ bachānā kyā
ab aa ga.e haiñ to maqtal se bach ke jaanā kyā
in āñdhiyoñ meñ bhalā kaun idhar se guzregā
darīche kholnā kaisā diye jalānā kyā
jo tiir būḌhoñ kī fariyād tak nahīñ sunte
to un ke sāmne bachchoñ kā muskurānā kyā
maiñ gir gayā huuñ to ab siine se utar aao
diler dushmano TuuTe makāñ ko Dhānā kyā
na.ī zamīñ kī havā.eñ bhī jān-levā haiñ
na lauTne ke liye kashtiyāñ jalānā kyā
kanār-e-āb khaḌī khetiyāñ ye sochtī haiñ
vo narm-rau hai nadī kā magar Thikānā kyā