āshiq kī jaan jaatī hai is bāñkpan ko chhoḌ
ai but ḳhudā ke vāste apne chalan ko chhoḌ
bulbul na rahm aa.egā sayyād ko kabhī
hai jaan agar aziiz to tū is chaman ko chhoḌ
us kā yahī tarīq rahā āshiqoñ ke saath
ai dil bas ab shikāyat-e-charḳh-e-kuhan ko chhoḌ
sahrā kī samt paañv baḌhe jaate haiñ dil aa
vahshat pukārtī hai ki hubbulvatan ko chhoḌ
basne ko chal tū dasht-e-ḳhizāñ-dīda meñ 'shabāb'
gulzār meñ bahār-e-gul-o-nastaran ko chhoḌ