kahāñ furqat meñ hai dildār uThnā baiThnā chalnā

tere āshiq ko hai dushvār uThnā baiThnā chalnā

tumhārā vahshī-e-lāġhar na Thahrā shahr meñ dam bhar

pasand aayā sar-e-kohsār uThnā baiThnā chalnā

faqīrāna kisī ke zer-e-sā.e ham bhī rahte haiñ

hamesha hai pas-e-dīvār uThnā baiThnā chalnā

kaheñ kyā dosto is ishq ne aajiz kiyā ham ko

girāñ hotā hai ab har baar uThnā baiThnā chalnā

'shabāb' is be-ḳhudī meñ mashġhala hai bas yahī baaqī

miyān-e-kūcha-e-dildār uThnā baiThnā chalnā