kis lutf se mahfil meñ biThā.e ga.e ham log
kyā raaz thā ḳhātir meñ jo laa.e ga.e ham log
sham.eñ tirī yādoñ kī jalā.e ga.e ham log
ashkoñ ke ḳhazāne the luTā.e ga.e ham log
sar naqsh-e-kaf-e-pā pe jhukā.e ga.e ham log
yuuñ rasm-e-vafā un se banā.e ga.e ham log
ġhairoñ ne murattab kiye afsāne sitam ke
afsānoñ ke unvān banā.e ga.e ham log
haiñ morid-e-ilzām hamīñ terī nazar meñ
duniyā kī ḳhatāoñ pe satā.e ga.e ham log
go ham na rahe rah gayā afsāna hamārā
maazī kī tarah ho ga.e aa.e ga.e ham log
ham miT ga.e duniyā se to samjhī hameñ duniyā
kho.e ga.e ham log to paa.e ga.e ham log
achchhe rahe vo log jo bande the havas ke
ādāb-e-mohabbat meñ miTā.e ga.e ham log
kuchh aise gire 'saif' nigāhoñ se ham un kī
jis bazm meñ bhī pahuñche uThā.e ga.e ham log