rag-e-jāñ meñ samā jaatī ho jānāñ
tum itnā yaad kyuuñ aatī ho jānāñ
tumhāre saa.e hai pahlū meñ ab tak
ki jā kar bhī kahāñ jaatī ho jānāñ
mirī nīndeñ uḌā rakkhī haiñ tum ne
ye kaise ḳhvāb dikhlātī ho jānāñ
kisī din dekhnā mar jā.ūñgā maiñ
mirī qasmeñ bahut khātī ho jānāñ
vo suntā huuñ maiñ apnī dhaḌkanoñ se
tum āñkhoñ se jo kah jaatī ho jānāñ
parāyā-pan nahīñ apnā.iyat hai
jo yuuñ āñkheñ churā jaatī ho jānāñ