dard ke dā.imī rishtoñ se lipaT jaate haiñ
aks rote haiñ to shīshoñ se lipaT jaate haiñ
haa.e vo log jinheñ ham ne bhulā rakkhā hai
yaad aate haiñ to sāñsoñ se lipaT jaate haiñ
kis ke pairoñ ke nishāñ haiñ ki musāfir bhī ab
manzileñ bhuul ke rastoñ se lipaT jaate haiñ
jab vo rotā hai to yak-laḳht mirī pyaas ke hoñT
us kī āñkhoñ ke kināroñ se lipaT jaate haiñ
jab unheñ niiñd panāheñ nahīñ detī haiñ 'asad'
ḳhvāb phir jāgtī āñkhoñ se lipaT jaate haiñ