terī yādeñ bahāl rakhtī hai
raat dil par vabāl rakhtī hai
shab-e-ġham kī ye rāgnī ban meñ
bāñsurī jaisī taal rakhtī hai
dil kī vaadī se uThne vaalī kiran
vahshatoñ ko ujaal rakhtī hai
bām-o-dar par utarne vaalī dhuup
sabz rañg-e-malāl rakhtī hai
shaam khultī hai tere aane se
lab pe terā savāl rakhtī hai
ek laḌkī udaas safhoñ meñ
ik jazīra sambhāl rakhtī hai
āḳhirī diip kī laraztī lau
mahr o mah sā jamāl rakhtī hai