sunahrī dhuup se chehra nikhār letī huuñ

udāsiyoñ meñ bhī ḳhud ko sañvār letī huuñ

mire vajūd ke andar hai ik qadīm makān

jahāñ se maiñ ye udāsī udhār letī huuñ

kabhī kabhī mujhe ḳhud par yaqīñ nahīñ hotā

kabhī kabhī maiñ ḳhudā ko pukār letī huuñ

janam janam kī thakāvaT hai mere siine meñ

jise maiñ apne suḳhan meñ utaar letī huuñ

maiñ ab bhī yaad to kartī huuñ āsima us ko

usī kā ġham hai jise maiñ sahār letī huuñ