mire andar jo lahrāne lagī hai
mujhī ko mujh se uljhāne lagī hai
na tū poras na shāyad maiñ sikandar
laḌā.ī par bhī laḌ jaane lagī hai
kisī girte hue patte se pūchho
daraḳhtoñ ko havā khāne lagī hai
savā neze pe sūraj aa gayā hai
nadī meñ baaḌh sī aane lagī hai
vo jis ko zehn se jhaTkā diyā thā
vo ḳhvāhish dil meñ ghar paane lagī hai
lakīreñ pīTne vāloñ ko 'ḳhālid'
lakīroñ par hañsī aane lagī hai