itne ūñche martabe tak tujh ko pahuñchā.egā kaun

maiñ huā munkir to phir terī qasam khā.egā kaun

tere raste meñ khaḌī thiiñ kaun sī majbūriyāñ

maiñ samajh lūñgā magar duniyā ko samjhā.egā kaun

mil rahī hai jab hameñ ik rāhat-e-āvārgī

lauT kar is anjuman se apne ghar jā.egā kaun

merī ma.azūlī kī sunñā chāhte haiñ sab ḳhabar

sochtā huuñ jā-nashīñ ban kar mirā aa.egā kaun

chāhtā huuñ ek chiñgārī maiñ is chaqmāq se

lekin is patthar se āḳhir mujh ko Takrā.egā kaun

nek logoñ ke liye maujūd ho tum ai ḳhizar

maiñ agar bhaTkā to mujh ko raah par lā.egā kaun

us ke va.adoñ meñ 'qatīl' ik husn ik ra.anā.ī hai

vo na hogā jab to us sā mujh ko bahalā.egā kaun