jo dil kī bārgāh meñ tajalliyāñ dikhā gayā
mire havās-o-hosh par surūr ban ke chhā gayā
tire baġhair zindagī guzārnā muhāl thā
magar ye qalb-e-nā-tavāñ ye bojh bhī uThā gayā
jo shaḳhs merī zaat meñ basā huā thā muddatoñ
na jaane mujh se ruuTh kar vo ab kahāñ chalā gayā
phir aaj ik havā-e-ġham udaas dil ko kar ga.ī
ḳhayāl terī yaad kā nazar ko phir bujhā gayā
kabhī qadam jo thak ga.e ġhamoñ kī rahguzār meñ
tirī nazar kā nuur thā jo hausle baḌhā gayā