gaate hue peḌoñ kī ḳhunuk chhāñv se aage nikal aa.e
ham dhuup meñ jalne ko tire gaañv se aage nikal aa.e
aisā bhī to mumkin hai mile be-talab ik muzhda-e-manzil
ham apnī duāoñ se tamannāoñ se aage nikal aa.e
thoḌā sā bhī jin logoñ ko irfān-e-mazāhib thā vo bach kar
ka.aboñ se shivāloñ se kalīsāoñ se aage nikal aa.e
the ham bhī gunāhgār har ik zāhid-e-makkār kī zid meñ
bāzār meñ biktī huī salmāoñ se aage nikal aa.e
shahroñ ke makīnoñ se milī jab hameñ vahshat kī zamānat
ham sī ke garebānoñ ko sahrāoñ se aage nikal aa.e
bantī rahī ik duniyā 'qatīl' apnī ḳharīdār magar ham
yūsuf na bane aur zuleḳhāoñ se aage nikal aa.e