nahīñ hai ab koī rasta nahīñ hai
koī juz aap ke apnā nahīñ hai
har ik raste kā patthar pūchhtā hai
tujhe kyā kuchh bhī ab dikhtā nahīñ hai
ajab hai raushnī tārīkiyoñ sī
ki maiñ huuñ aur mirā saaya nahīñ hai
parastish kī hai merī dhaḌkanoñ ne
tujhe maiñ ne faqat chāhā nahīñ hai
maiñ shāyad tere dukh meñ mar gayā huuñ
ki ab siine meñ kuchh dikhtā nahīñ hai
luTā dī maut bhī qadmoñ pe tere
bachā kar tujh se kuchh rakkhā nahīñ hai
qayāmat hai yahī idrāk-e-jānāñ
maiñ us kā huuñ ki jo merā nahīñ hai
mirī bāteñ haiñ sab bāteñ tumhārī
mirā apnā koī qissa nahīñ hai
tujhe mahsūs bhī maiñ kar na pā.ūñ
añdherā hai magar itnā nahīñ hai
ba-juz niitū kī yādeñ ab jahāñ meñ
koī 'shahzād' jī terā nahīñ hai