barsoñ tapish-e-ġham meñ ye ehsās jale hai

tab jā ke kahīñ sher ke sāñche meñ Dhale hai

kuchh aise terī bazm meñ baiThā huuñ akelā

jis tarah sar-e-rāh koī sham.a jale hai

allāh kisī shaḳhs ko rusvā na kare yuuñ

mujh se mirā saaya bhī to ab bach ke chale hai

is manzil-e-dushvār se hans hans ke guzar jā

pagle kahīñ rone se shab-e-hijr Dhale hai

har roz nayā ruup badaltī hai terī yaad

aahoñ meñ Dhale hai kabhī ashkoñ meñ Dhale hai

har shahr meñ hone lagī añgusht-numā.ī

rusvā.ī mirī mujh se bhī kuchh aage chale hai

ik roz use TuuT hī jaanā thā bahar-hāl

dil toḌ ke tū kyuuñ kaf-e-afsos male hai