sahn-e-maqtal meñ har ik zaḳhm-e-tamannā rakh do

aur qātil kā nayā naam masīhā rakh do

ab to rusvā.ī kī had meñ hai merī tishna-labī

ab to hoñThoñ pe dahaktā huā sho.ala rakh do

kitnī tārīk hai shab mere makāñ kī yāroñ

in muñDeroñ pe koī chāñd sā chehra rakh do

ab kī bārish meñ mirā naam chamak jā.egā

laakh tum ret kī tah meñ mirā katba rakh do

phir bhī haq baat ke kahne se na ba.az ā.ūñgā

mere hāthoñ pe bhale daulat-e-duniyā rakh do

niiñd sī aane lagī zulf ke saa.e meñ mujhe

phir mire ḳhvāboñ pe taptā huā sahrā rakh do

mere afsāne ko phir moḌ nayā sā de do

aur unvān sulagtā huā lamha rakh do

jo samajhte hī nahīñ merī zabāñ ko 'ishrat'

un ke afkār meñ merā lab-o-lahja rakh do